പുനലൂര്‍: വനം വകുപ്പിന്റെ നിയന്ത്രണത്തിലുള്ള കോടികള്‍ വിലമതിക്കുന്ന കെട്ടിടങ്ങള്‍ നാശത്തിന്റെ വക്കിലായിട്ട് വര്‍ഷങ്ങള്‍ പിന്നിടുന്നു. അച്ചന്‍കോവില്‍, തെന്മല, പുനലൂര്‍ എന്നീ ഫോറസ്റ്റ് ഡിവിഷനുകളുടെ കീഴിലുള്ള പ്രദേശങ്ങളിലെ 50 ഓളം കെട്ടിടങ്ങളാണ് നശിച്ച്‌ ഏത് സമയവും നിലം പൊത്താവുന്ന അവസ്ഥയിലുള്ളത്.
അര നൂറ്റാണ്ടിലധികം പഴക്കം വരുന്ന കെട്ടിടങ്ങളുടെ മേല്‍ക്കൂരയും ഭിത്തികളും തകര്‍ന്നു. കാലാകാലങ്ങളില്‍ കെട്ടിങ്ങളുടെ അറ്റകുറ്റപ്പണി നടത്താതിരുന്നതാണ് ഇപ്പോഴത്തെ ശോച്യാവസ്ഥയ്ക്ക് കാരണം. ഭൂരിഭാഗം കെട്ടിടങ്ങളും ഓട് മേഞ്ഞവയാണ്. ഓടുകള്‍ തകരുകയും കാട് വളര്‍ന്ന് മൂടുകയും ചെയ്തത് കാരണം പുറത്ത് നില്‍ക്കുന്നവര്‍ക്ക് കെട്ടിടം കാണാന്‍ പോലും കഴിയാത്ത അവസ്ഥയാണ് . അച്ചന്‍കോവില്‍, ആര്യങ്കാവ്, ഇടപ്പാളയം, തെന്മല, ഉറുകുന്ന്, അണ്ടൂര്‍പച്ച, ആനപെട്ടകോങ്കല്‍, ഇടമണ്‍, ഉപ്പുകുഴി, മാമ്പഴത്തറ, പുനലൂര്‍, കറവൂര്‍, പുന്നല, മുള്ളമല, ചെരിപ്പിട്ടകാവ് തുടങ്ങിയ പ്രദേശങ്ങളില്‍ വനംവകുപ്പിന്‍െറ ഉടമസ്ഥതയില്‍ കെട്ടിടങ്ങളുണ്ട്. ഇവയെല്ലാം നാശോന്മുഖമാണ്.
തെന്മല ഫോറസ്റ്റ് ഡിവിഷണല്‍ ഓഫീസിന് സമീപം മാത്രം അഞ്ച് കെട്ടിടങ്ങളാണ് നാശത്തിന്റെ വക്കിലെത്തി നില്‍ക്കുന്നത്. 20 വര്‍ഷം മുമ്പ് വരെ ഈ കെട്ടിടങ്ങളില്‍ വിവിധ ഓഫീസുകള്‍ പ്രവര്‍ത്തിച്ചിരുന്നു.
കെട്ടിടങ്ങള്‍ നവീകരിച്ച്‌ മോടിപിടിച്ച്‌ വിനോദസഞ്ചാരികള്‍ക്ക് വാടകയ്ക്ക് നല്‍കിയാല്‍ വനംവകുപ്പിന് ലക്ഷങ്ങള്‍ വരുമാനം ലഭിക്കും. ദൂരെ സ്ഥലങ്ങളില്‍ നിന്ന് ഏറ്റവും കുടുതല്‍ വിനോദസഞ്ചാരികള്‍ എത്തുന്ന മേഖലയിലാണിത്. ടൂറിസ്റ്റുകള്‍ക്ക് രാത്രിയില്‍ താമസിക്കാന്‍ തെന്മല അടക്കമുളള പ്രദേശങ്ങളില്‍ ഇപ്പോള്‍ സൗകര്യമില്ല. ഇത് കാരണം പുനലൂരിലെ സ്വകാര്യ ലോഡ്ജുകളെയാണ് വിനോദസഞ്ചാരികള്‍ ആശ്രയിക്കുന്നത്. വനംവകുപ്പിന്റെ ഉപയോഗമില്ലാതെ കിടക്കുന്ന കെട്ടിടങ്ങള്‍ പുനരുദ്ധരിച്ച്‌ മോടി പിടിപ്പിച്ച്‌ വാടകയ്ക്ക് നല്‍കിയാല്‍ വിനോദ സഞ്ചാരികളുടെ ബുദ്ധിമുട്ടുകള്‍ക്ക് പരിഹാരമാവുകയും വനംവകുപ്പിന് മെച്ചപ്പെട്ട വരുമാനം ലഭിക്കുകയും ചെയ്യും.
'ഫണ്ടിന്‍െറ അഭാവം കാരണമാണ് കെട്ടിടങ്ങള്‍ നവീകരിക്കാന്‍ കഴിയാത്തത്. കഴിഞ്ഞ സാമ്പത്തിക വര്‍ഷം 20 ലക്ഷം രൂപ ചെലവഴിച്ച്‌ അഞ്ച് കെട്ടിടങ്ങള്‍ നവീകരിച്ചിരുന്നു. ഈ വര്‍ഷം കെട്ടിടങ്ങളുടെ അറ്റകുറ്റപ്പണിക്ക് 40 ലക്ഷം രൂപ വകയിരുത്തിയിട്ടുണ്ട്'.
സുനില്‍ബാബു
(ഡിവിഷണല്‍ ഫോറസ്റ്റ് ഓഫീസര്‍, തെന്മല)
ഒരു അഭിപ്രായം പോസ്റ്റ് ചെയ്യൂ
ഒരു അഭിപ്രായം പോസ്റ്റ് ചെയ്യൂ