പുനലൂര്‍: ഒമ്പതാം ക്ലാസ് വിദ്യാര്‍ത്ഥിയെ കനാലിന് സമീപം ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തിയ സംഭവം ക്രൈം ബ്രാഞ്ച് അന്വേഷിക്കണമെന്ന് മാതാപിതാക്കള്‍ വാര്‍ത്താ സമ്മേളനത്തില്‍ ആവശ്യപ്പെട്ടു. വെഞ്ചേമ്പ് എന്‍.ജി.പി.എം.എച്ച്‌.എസ് സ്‌കൂള്‍ വിദ്യാര്‍ത്ഥിയായിരുന്ന എ.ജി. ജിഷ്‌ണുലാലിനെയാണ് മാര്‍ച്ച്‌ 24ന് വാഴവിള കെ.ഐ.പി ഇടതുകര കനാലിന്റെ കട്ട്-ഇന്‍-കവറിന് സമീപം മരിച്ച നിലയില്‍ കണ്ടെത്തിയത്.
മരണത്തില്‍ അന്വേഷണം ആവശ്യപ്പെട്ട് മുഖ്യമന്ത്രി, പ്രതിപക്ഷ നേതാവ്, ഡി.ജി.പി, ജില്ലാ കളക്‌ടര്‍, റൂറല്‍ എസ്.പി, ഡിവൈ.എസ്.പി, മനുഷ്യാവകാശ കമ്മിഷന് എന്നിവര്‍ക്ക് രക്ഷിതാക്കള്‍ നിവേദനം നല്‍കിയിരുന്നു. എന്നാല്‍ മൂന്ന് മാസം കഴിഞ്ഞിട്ടും യാതൊരു നടപടിയും ഉണ്ടായില്ല. മനുഷ്യാവകാശ കമ്മിഷന് പുനലൂര്‍ എസ്.എച്ച്‌.ഒ സമര്‍പ്പിച്ച റിപ്പോര്‍ട്ട് വസ്‌തുതാ വിരുദ്ധമാണെന്ന് രക്ഷിതാക്കള്‍ ആരോപിച്ചു.
പോസ്‌മോര്‍ട്ടം റിപ്പോര്‍ട്ടില്‍ പറയുന്ന മരണത്തിന് മുമ്ബ് സംഭവിച്ച മുറിവുകള്‍, കനാലില്‍ വീണത്, വീടിനുള്ളില്‍ കണ്ട രക്തതുള്ളികള്‍ എന്നിവയ്‌ക്ക് ഉത്തരം കണ്ടെത്തണമെന്നും അവര്‍ ആവശ്യപ്പെട്ടു. സ്‌കൂളിലെ സ്‌പോര്‍ട്‌സ് ഡേയില്‍ ഉണ്ടായ തര്‍ക്കത്തിലും അടിപിടിയിലും ഉള്‍പ്പെട്ട ചിലര്‍ മകനെ പിന്തുടര്‍ന്നിരുന്നു. ഇത് കൊലപാതകമാണെന്ന സംശയം വര്‍ദ്ധിപ്പിക്കുന്നതാണ്.
ലോക്കല്‍ പൊലീസിന്റെ അന്വേഷണം തൃപ്‌തികരമല്ലാത്തതിനാല്‍ വിഷയം ക്രൈംബ്രാഞ്ച് അന്വേഷിക്കണമെന്നും അവര്‍ ആവശ്യപ്പെട്ടു.
ഒരു അഭിപ്രായം പോസ്റ്റ് ചെയ്യൂ
ഒരു അഭിപ്രായം പോസ്റ്റ് ചെയ്യൂ