അഞ്ചല്‍: റോസ്‌മല വനത്തില്‍ നിന്ന് കാട്ടുപോത്തിനെ വെടിവച്ച്‌ കൊന്ന് ജില്ലയുടെ കിഴക്കന്‍ മേഖലയില്‍ വില്‍പ്പന നടത്തിവന്ന സംഘത്തിലെ അഞ്ചല്‍ സ്വദേശികളായ അനില്‍കുമാര്‍, ബിനു എന്നിവര്‍ അഞ്ചല്‍ ഫോറസ്റ്റ് റെയ്ഞ്ച് ഓഫീസില്‍ കീഴടങ്ങി. കോടതിയില്‍ ഹാജരാക്കിയ ഇവരെ റിമാന്‍ഡ് ചെയ്തു.
ഒരുവര്‍ഷമായി ഇവര്‍ കാട്ടുപോത്തിന്റെ ഇറച്ചി ഉപയോഗിക്കുകയും വില്‍പ്പന നടത്തിവരികയുമായിരുന്നെന്ന് വനപാലകര്‍ പറഞ്ഞു. ആദ്യമൊക്കെ ബന്ധുക്കള്‍ക്കും സുഹൃത്തുക്കള്‍ക്കും കാട്ട് പോത്തിറിച്ച്‌ നല്‍കിയിരുന്ന ഇവര്‍ പിന്നീട് വില്‍പ്പനയിലേക്ക് തിരിയുകയായിരുന്നു. അഞ്ചലില്‍ എട്ട് കിലോ കാട്ടുപോത്തിറിച്ചി വില്‍പ്പന നടത്താന്‍ ശ്രമിക്കുന്നതിനിടയില്‍ പിടികൂടാനെത്തിയ പൊലീസിനെ വെട്ടിച്ച്‌ ഇവര്‍ കടന്നിരുന്നു. സംഘത്തിലെ രണ്ട് പേര്‍ നേരത്തെ പിടിയിലായിരുന്നു. രണ്ട് മാസത്തോളം തമിഴ്നാടിന്റെ വിവിധ ഭാഗങ്ങളില്‍ ഒളിവില്‍ കഴിഞ്ഞ ബിനുവും അനില്‍കുമാറും ഹൈക്കടതിയില്‍ ജാമ്യത്തിന് അപേക്ഷിച്ചെങ്കിലും കിട്ടാതിരുന്നതിനെ തുടര്‍ന്ന് ഫോറസ്റ്റ് റേഞ്ച് ഓഫീസില്‍ കീഴടങ്ങുകയായിരുന്നു.
ഒരു കാട്ടുപോത്തിനെ കൊന്നാല്‍ 400 കിലോ ഇറച്ചി ലഭിക്കുമെന്നും ഇത് വിറ്റാല്‍ ഒന്നര ലക്ഷത്തോളം രൂപ കിട്ടുമെന്നും പ്രതികള്‍ ചോദ്യം ചെയ്യലില്‍ വെളിപ്പെടുത്തി. കാട്ടുപോത്തിനെ വെടിവച്ചുകൊല്ലാന്‍ വിദഗ്ദ്ധനായ വിളക്കുവെട്ടം സാബുവിന് വേണ്ടി വനംവകുപ്പ് പ്രത്യകേ അന്വേഷണം സംഘം രൂപീകരിച്ച്‌ തിരിച്ചില്‍ നടത്തിവരുന്നു.
ഒരു അഭിപ്രായം പോസ്റ്റ് ചെയ്യൂ
ഒരു അഭിപ്രായം പോസ്റ്റ് ചെയ്യൂ