മന്ത്രി കെ രാജു ഉദ്ഘാടനം ചെയ്തു ഓണസമൃദ്ധി - കാര്‍ഷിക വിപണി തുടങ്ങി

കാര്‍ഷികവികസന കര്‍ഷകക്ഷേമ വകുപ്പിന്റെ ആഭിമുഖ്യത്തില്‍ സംഘടിപ്പിക്കുന്ന ഓണസമൃദ്ധി കാര്‍ഷിക വിപണി അഞ്ചല്‍ മിനി സിവില്‍ സ്റ്റേഷന്‍ വളപ്പില്‍ പ്രവര്‍ത്തനം തുടങ്ങി.   വനം - വന്യജീവി, മൃഗസംരക്ഷണ വകുപ്പ് മന്ത്രി കെ രാജു ഉദ്ഘാടനം നിര്‍വഹിച്ചു.
കര്‍ഷകരുടെ ഉത്പന്നങ്ങള്‍ക്ക് ന്യായമായ വില ലഭ്യമാക്കുന്നതിനും സാധാരണക്കാര്‍ക്ക് വിഷരഹിത നാടന്‍ കാര്‍ഷിക ഉല്‍പന്നങ്ങള്‍  വിലക്കുറവോടെ ലഭ്യമാക്കാനുമാണ് മേളകള്‍ നടത്തുന്നതെന്ന് മന്ത്രി പറഞ്ഞു. പ്രകൃതിദുരന്തം കാര്‍ഷികമേഖലയെ തകര്‍ത്തുവെങ്കിലും സര്‍ക്കാര്‍ ഇടപെടല്‍ വഴി  ശക്തമായ പുനരുജ്ജീവനത്തിന് സാഹചര്യം ഒരുക്കാനായി എന്നും അദ്ദേഹം കൂട്ടിച്ചേര്‍ത്തു.
അഞ്ചല്‍ ബ്ലോക്ക് പഞ്ചായത്ത് പ്രസിഡന്റ് രഞ്ജു സുരേഷ് അധ്യക്ഷയായി. അഞ്ചല്‍ ഗ്രാമപഞ്ചായത്ത് പ്രസിഡന്റ് മിനി സുരേഷ്, ജില്ലാ പ്രിന്‍സിപ്പല്‍ അഗ്രികള്‍ച്ചറല്‍ ഓഫീസര്‍ സിബി ജോസഫ് പേരയില്‍, അഗ്രികള്‍ച്ചറല്‍ ഡെപ്യൂട്ടി ഡയറക്ടര്‍ അനിതാമണി, ബ്ലോക്ക് - ഗ്രാമ പഞ്ചായത്ത് അംഗങ്ങള്‍, വി എഫ് പി സി കെ ഭാരവാഹികള്‍ തുടങ്ങിയവര്‍ പങ്കെടുത്തു. സെപ്തംബര്‍ 10 വരെ മേള തുടരും. തദ്ദേശീയമായി ഉത്പാദിപ്പിച്ച വിഷരഹിത പച്ചക്കറികളും  പഴവര്‍ഗങ്ങളുമാണ് ഓണസമൃദ്ധി  വിപണിയിലുള്ളത്.