ലോക പേവിഷ ദിനാചരണത്തിന്റെ ഭാഗമായി ജില്ലയില്‍ മൃഗസംരക്ഷണ വകുപ്പും ആരോഗ്യ വകുപ്പും സംയുക്തമായി വിവിധ പദ്ധതികള്‍ നടപ്പിലാക്കും. പേവിഷബാധ വഴിയുള്ള മരണങ്ങള്‍ ഒഴിവാക്കുകയാണ് ലക്ഷ്യം. ഇതിനായി വാക്‌സിനുകളും സിറവും ആരോഗ്യ വകുപ്പ് സൗജന്യമായി നല്‍കും.
ജില്ലാ ആശുപത്രി, വിക്‌ടോറിയ ആശുപത്രി, നീണ്ടകര, ശാസ്താംകോട്ട, പുനലൂര്‍, കടയ്ക്കല്‍, കൊട്ടാരക്കര കരുനാഗപ്പള്ളി, നെടുങ്ങോലം, കുണ്ടറ താലൂക്ക് ആശുപത്രികളിലും ജില്ലയിലെ 16 കമ്മ്യൂണിറ്റി ഹെല്‍ത്ത് സെന്ററുകളിലും വാക്‌സിനുകള്‍ ശേഖരിച്ചിട്ടുണ്ട്.
മുഖത്തും കൈയ്യിലും കടിയേല്‍ക്കുന്നവര്‍ക്ക് കുത്തിവയ്ക്കാന്‍ ആവശ്യമുളള ഡോസിന് 20,000 രൂപ വിലയുള്ള സിറവും ആരോഗ്യ വകുപ്പ് സൗജന്യമായി നല്‍കും. പാരിപ്പള്ളി മെഡിക്കല്‍ കോളേജില്‍ ക്രമീകരണങ്ങള്‍ ഏര്‍പ്പെടുത്തി.
തെരുവ് നായ്ക്കളുടെ ജനന നിയന്ത്രണവും വീടുകളില്‍ വളര്‍ത്തുന്ന നായ്ക്കളുടെ പ്രതിരോധ കുത്തിവയ്പുമാണ് മൃഗസംരക്ഷണ വകുപ്പ് നടപ്പിലാക്കുന്ന പരിപാടി. ജനനനിയന്ത്രണ ശസ്ത്രക്രിയകള്‍ നടത്താനായി ജില്ലയില്‍ ഏഴോളം കേന്ദ്രങ്ങളാണുള്ളത്. ജില്ലാ പഞ്ചായത്തിന്റെ നേതൃത്വത്തില്‍ നടപ്പാക്കുന്ന എ ബി സി പദ്ധതി പ്രകാരം 23,000 തെരുവ് നായ്ക്കളെ വന്ധ്യംകരണ ശസ്ത്രക്രിയക്ക് വിധേയമാക്കി.
ശ്രീനാരായണ വനിതാ കോളേജില്‍ ഇന്ത്യന്‍ വെറ്ററിനറി അസോസിയേഷന്‍ ദിനാചരണത്തിന്റെ ഭാഗമായി സംഘടിപ്പിച്ച സെമിനാര്‍ പ്രിന്‍സിപ്പല്‍ ഡോ കെ അനിരുദ്ധന്‍ ഉദ്ഘാടനം ചെയ്തു. ആരോഗ്യ വകുപ്പ് ഡെപ്യൂട്ടി മെഡിക്കല്‍ ഓഫീസര്‍ ഡോ ആര്‍ സന്ധ്യ, ജില്ലാ മൃഗസംരക്ഷണ ഓഫീസര്‍ ഡോ ഡോളിമോള്‍, ഐ വി എ പ്രസിഡന്റ് ഡോ സി രമേശന്‍ ബാബു, ചീഫ് വെറ്ററിനറി ഓഫീസര്‍ ഡോ കെ കെ തോമസ്, അസിസ്റ്റന്റ് ഡയറക്ടര്‍ ഡോ ഡി ഷൈന്‍കുമാര്‍, ഡോ രാജു, കോ-ഓര്‍ഡിനേറ്റര്‍ ഡോ നിഷ, ശ്രീജ തുടങ്ങിയവര്‍ പങ്കെടുത്തു.
ഒരു അഭിപ്രായം പോസ്റ്റ് ചെയ്യൂ
ഒരു അഭിപ്രായം പോസ്റ്റ് ചെയ്യൂ